Norski skógarfræbankinn (Det norske Skogfrøverk) hefur til fjölda ára haft ánægju af að afgreiða trjáfræ til notkunar í íslenskri skógrækt. Eftir að Skógrækt ríkisins hætti innflutningi á fræi höfum við orðið vör við aukinn áhuga hjá íslenskum gróðrarstöðvum fyrir að notfæra sér þjónustu okkar. Til að koma til móts við aukna eftirspurn höfum við opnað netverslun á íslensku. Eins og áður er hægt að senda pantanir og fyrirspurnir á íslensku til okkar. Skriflegum fyrirspurnum verður svarað á norsku en það er möguleiki að fá svör á íslensku með því að hringja í framkvæmdastjórann (+47 99511266).

Skógarfræbankinn rekur ekki eingöngu fræverslun heldur er eitt aðalhlutverkið að vera fræbanki fyrir norsku skógræktina. Fræeiningar sem hörgull er á verðum við að taka frá fyrir norska markaðinn. Við munu samt alltaf reyna að afgreiða þær pantanir sem berast frá íslenskum gróðrarstöðvum. Skógarfræbankinn hefur góð viðskiptasambönd um allan heim og getur aðstoðað við að útvega fræ í gegnum þessi sambönd. Við getum einnig skipulagt fræsöfunun af norskum trjátegundum og kvæmum sem ekki eru í vörulistanum. Vinsamlegast takið eftir afgreiðslufrestum vegna pantana á fræi sem ekki er til á lager.

Allar fræeiningar sem við afgreiðum eru prófaðar í okkar eigin rannsóknarstofu eftir viðurkenndum reglum frá ISTA (International Seed Testing Association) og eru afgreiddar með fræskírteinum í samræmi við O.E.C.D.-reglurnar. Reynslan sýnir að fræsalar fylgja ekki alltaf ströngustu kröfum um frægæði. Hátt vatnsinnihald og mikil óhreinindi í fræi er algengt vandamál í fræviðskiptum. Allt fræ sem Skógarfræbankinn flytur inn er þess vegna spírunarprófað og meðhöndlað eftir þörfum fyrir sölu. Þetta er gæðatrygging fyrir gróðrarstöðvarnar og þær taka þannig lágmarks áhættu við fræinnkaup.

Til viðbótar við fræverslun bjóðum við upp á ýmsa þjónustu s.s.:

-Gæðaprófun á fræi (spírunarpróf og röntgengreining)
-Hreinsun á dauðu og skemmdu fræi úr fræeiningum með lága spírun (IDS- og Prevac-meðhöndlun)
-Örvun fræs með lága spírunarorku (ID-meðhöndlun)
-Rof frædvala (stratifisering) hjá frætegundum í dvala
-Þvott til að fjarlægja trjákvoðu af fræi
-Afvængjun og hreinsun á fræi
-Geymslu og afhendingu á fræi sem er í eigu viðskiptavina

Við bjóðum nýja og gamla viðskiptavini velkomna til okkar!

Lerkiblóm
Mynd: Ragnar Johnskås, Skogfrøverket

Fræi safnað af stafafuru

Valin móðurtré af stafafuru úr íslenskum skógarreitum, fræsöfnunarmenn í hvíld.

Myndir: Ragnar Johnskås, Norski skógarfræbankinn